再談機械人植髪 Robotic Hair Restoration


去年本網已公開過對機械人植髪的睇法,大家可以 舊 post 重溫一下

過去數月很多網友來郵,話台灣已有七台機械人 ARTAS,點解香港咁落後?我話其實唔係香港落後,而係香港醫生醒 D ,知道香港市民唔係盲目追求新科技,而係會考慮性價比 Value for Money,君不見小米銷售一 D 都唔會差過 Iphone 6 好多咩? 所以機械人植髪在香港未必有市場,用三、四百萬買番來隨時血本無歸!早排有人話養和醫院會買,但好似冇左下文。


違反海關商品說明條例

現時大部份植髮中心購買 ARTAS ,都是宣傳多於真係用,在台灣會有醫生以 「機械人植髪亅或 「植髮機器人」 作招徠,聽落好似好勁!其實是錯譯。 Robotic Hair Restoration 中的 Robotic 是形容詞而非名詞,是指用人工智能機械臂,根據收集到的西方人頭髪資料,用電腦憑頭髪突出的角度,預測毛囊根部的方向,再以電動小圓管,將毛囊與周圍皮膚分離。

但 ARTAS 祇是以半自動方式操作,必須先由醫生選定拔髪的部位,還需要以人手拔出及移植毛囊,在香港最多祇能稱為「機械臂拔髪」,不能稱為「機械人植髪亅,否則會被海關檢控,因為根據香港法例第362章《商品說明條例》及當中的八條附屬法例,是禁止在營商過程中,對提供的貨品作出虛假商品說明、以及虛假、具誤導性或不完整的資料及錯誤陳述。唔排除將來香港有植髮中心以「機械人植髮」作招倈,網友可直接向海關舉報。



選用 ARTAS 注意事項

  • 機械臂祇負責拔髮,其他步驟還需要由醫生進行
  • 植髮最終結果祝乎很多因素,機械操作未必比人手操作優勝
  • 美國有報導病人進行 ARTAS 植髪後冇頭髪生,應是植入時出錯,所以要同時考慮醫生的經驗
  • 據統計三成以上購買 ARTAS 的醫生都係植髪新手初哥,誤以為有左部機就會變專家,所以必須問清楚如果手術中途機件失靈,醫生係未有經驗人手操作,順利完成手術
  • 必須後枕剷青
  • 手術後後枕會留下點狀疤痕,絕非無疤
  • 機器每鑽一下,無論毛囊是否完整,供應商都會向醫生收取一美元 (八港元) 的 「開瓶費亅,所以網友一定要先問清楚醫生,拔出來的毛囊若果明知有傷殘,是否都要俾錢。換句話說,醫生會否會將失敗左嘅「開瓶費」轉嫁給病人

椅子的故事

有網友問 ARTAS 抜取每條頭髮的收費,高於人手 FUE 收費,是否代表 ARTAS 好 D? 未解釋前先說一個有關椅子的故事。
酒樓李老板發現有一張椅子爛左,要買過一張,便找木匠老三訂造,以前都是一百蚊一張,點知收貨時埋單要八百蚊! 李老板找木匠理論,老三施施然的說道,"椅子本來的成本及手工係一百蚊,但係我年紀大有老花,所以用百五蚊買左過老花眼鏡,用百五蚊買支無眨光嘅燈,而造椅子都幾悶吓,咪用三百蚊買左部音響,可以一路造嘢,一路聽歌。另外一百蚊係按摩費,你知啦楂得槌仔多會頸痛吖嗎,加埋未八百蚊囉!"

各位一定會問,呢個無厘頭嘅故仔同 ARTAS 有乜關係,大家不妨睇下 ARTAS 所列出的優點:

  • 減少醫生長期工作所引起的腰痠背痛
  • 令缺乏經驗甚至訓練的醫生都可提供植髮服務
  • 縮短手術時間等醫生可以做多幾個手術,睇多幾個病人
  • 減少毛囊傷亡,等 D 技術水平唔高嘅醫生都唔駛食白果
  • 以擁有最新科技來增加人流

大家有冇發覺所有嘅好處都係益左個醫生,而唔係益左個病人,所以我哋好唔明,咁點解病人要俾多 D 錢,等一班經驗淺嘅醫生,唔駛花時間去鑽研技術,而係唔辛苦嘅情況下,以最短時間為你進行一項足以影響你一生的植髮呢? 所以機械式植髮其實應該收平 D,係未?




廉價植髮的代價


價錢永遠是考慮植髮的重要因素,很多對植髮認知不多的朋友,往往會以幾錢一束作為選擇準則,但在作最後决定時,有兩點要提醒大家:

問清楚植髮是否要剷光頭

時間即係金錢,要以廉價進行植髮,必須減低開支,縮短手術時間,本身未甩晒重有頭髮要做植髮,會有一定難度,比剷光頭做隨時多上一兩個鐘頭,所以會有植髮中心堅持要剷光頭做,這本來唔係問題,最緊要係你情我願。
但曾經有網友出門前冇問清楚,攞晒假、落晒訂 、book 晒酒店、過到去先至 O 咀! 吓要剷晒呀... 唔通唔做咩? 原本諗住靜雞雞做左再同女朋友影結婚相,結果光住個頭返香港,全世界都知佢走去做植髮,重要係平個隻。佢本身係做銀行 Teller,結果被經理啤左足足成個月。所以大家去之前一定要問清楚,攞長 D 假,唔係分分鐘好大獲!

盡量要求早上進行植髮

時間即係金錢,要以廉價進行植髮,必須增加收入,所以會有植髮中心一天内同時進行幾個手術,這本來唔係問題,最緊要係你情我願。但植髮是非常耗神的工序,要連續幾個鐘頭,建議各位盡量要求早上開始,等工作人員可以有多 D 精力及心機,為你做靚 D !





2014 網頁更新


香港植髪網自 2010 年起,多謝各網友支持,可惜工務纏身,睡眠不足,已有多個月未作更新,亦未有定時回覆網友查詢,深表遺憾。

最近照鏡,發現兩邊髪角位比一年前上移左半吋,頭髪幼左,知道世紀大絕症 - 雄性禿 - 有惡化蹟像,有點心慌。 曾服藥一段時間,半年前停藥後就衰左,開始重新感受到脫髪的痛苦。亦相信很多網友正面臨同樣的困擾。

針吉到肉才知痛,的起心肝,決定重組本網以往內容,方便網友查閱,並會逐一回答網友的查詢,這當然需要一些時間。而以往本網主要踢爆市面上的誤導宣傳,火藥味較重,但年紀大開始收火,加上鬧極都冇乜用,政府又冇監管,苦思之下決定改變風格,除了維護正義,更會為網友提供更多的資訊。

2014 更新版首先加入了世界植髪發展史,另計劃貼上其他網站曾刊登過的精采文章,並逐一加入植髪及脫髪常用的專用名詞。希望大家可以在這裹找到有用的資料。本港各植髪中心的資料會盡快更新,但照慣例我們衹會例出註明醫生名字的植髪中心。

若網友有甚麼植髪經歷,歡迎與我們分享,我們不會公開私人資料及植髪中心的名字。請繼續支持香港植髪的正常發展,謝謝!

 

香港植髪網 Sept 2014








檢視全港的植髮中心

最後更新日期: 2014-7-17

 

 


Get free Dreamweaver templates and extensions at JustDreamweaver.com