一位北上植髮網友的經歷分享


本網事先聲明:
  • 國内的植髮醫生同全世界一樣,水準有参差,有高手,也有水兵
  • 以下屬真實過案,經網友書面同意才刊登,原文經整理後刊登,提醒吓其他有意北上的朋友
  • 文中 FUE 是指所謂微創植髮、或無疤植髮,用金屬管在頭皮上鑽孔,再將毛囊逐條抜出。手術後在捐髮區會出現千百個白點,同埋頭髮會疏左
  • 文中 FUT 又叫 strip 俗稱取皮,是有後枕取下一條狀有毛囊幻頭皮,再將取髮區上下既頭皮拉埋,縮細左頭皮面積,並留下一條 2-3mm 寬的疤,但唔會出現頭髮稀疏現像



: 你好,本人 30,大約係 3-4 期,兩個多月前曾到深圳 XX 醫院做 FUE 高精密植髮,移植了三千多個單位,但我發現我捐髮區變得好少頭髮,他們手術前說不會被發覺的,但現在照鏡我都可以清楚看到捐髮區的頭皮肉,並不如他們所說不會被外人發覺。
我想問這是正常術後現像嗎?之後情況會否有改善?
如不會有所改善,我有無補救方法( 如找另一家再做一次植髮到捐髮區)? 如果真的可以靠植髮植回我後腦稀少的地方,那我應該用那一種植髮方法? 我剛做完第一次植髮兩個多月,我要何時才適可進行第二次植髮?
我現在真的十分困擾,前面新植上去的正在長出來,但後腦的頭髮變得那麼稀少,那位置戴帽子又不能遮著,使我都不敢上街。
希望你們能夠提供一些意見給我,謝謝!
答:你又受骗了!
你非第一位面對此問題的。 移植了三千多個單位, 即是捐髮區少了 3500 束頭髮 (一般攞 1000 條會有 200-300 條唔用得) ,怎會手術後不會被發覺的! 唔合羅輯。
這絕對是正常術後現像。之後情況會有所改善,但不會完全正常番晒,冇左就係冇左。建議馬上在後枕搽 Rogaine 四個月,每天一至兩次。如無改善,補救方法如下:
  1. 留長頭髮
  2. 紋頭皮 Scalp Micropigmentation - 在後枕剌上很多點點,扮頭髮濃密
如找另一家再做一次植髮到捐髮區,咪係得個吉! 同埋係边到攞頭髮? 你後枕重边有头髮捐出? 所以同 FUT / Strip 取皮不同,FUE 的頭髮稀疏係冇計的 (除了上述方法),不可能靠植髮植回後腦稀少的地方。
我明白你的心情,惟有希望前面正常番,將頭髮 all back 向後疏。當然會建議你向其他植髮醫生,寻求專業意見。


: 我就係想問現在可否 fut 以取皮改善後腦的稀疏問題,我現在真的很想喊。
為什麼當初做 fut 就會好一點,取下頭皮的位置豈不是空了一大片? 還有做完手術把傷口縫合是把留下的頭皮再縫回頭上,還是把傷口上下的皮縫上, 其實 fut 係咪即係將取髮區上下既頭皮拉緊,縮細左頭皮面積,咁我而家或遲 d 做 fut 取出頭皮植回稀疏位置再縫上仄傷口都唔得呀?那如果我現在再做 fut 對我的情況會否有幫助。
我現在才30歲,我真的不想這樣一世呀
答:首先很明白你的心情。暫時不要太絕望,FUE 後捐髪區也有短暫脱髪 Shock Loss 的情況,有機會在四個月後出番 D,好過現有。
但要盡快使用 Minoxidil 5% (蓓健或類似,$200-550 不定視乎牌子,其實除左個盒係冇分別,各藥房有售) ,手術後四個月內使用,效果好D,一日一至兩次,塗或噴在捐髮區,四個月後才用效果差 D 。
當初做 fut 係會好一點,冇錯取下頭皮的位置是空了一大片,但會把傷口上下的皮拉埋再縫上,絕不會出現頭髮稀疏的問题。
但你現在不可能做 FUT 取皮來改善後腦的稀疏問題 ,一般人誤解以為 FUT 的疤很恐佈,但其实衹要留一吋頭髪便遮左睇唔到。可惜你做完 FUE 後頭髮稀梳在,再不能遮到 FUT 的疤,到時重難看。


: 請問香港邊度有專業的,有醫德的植髮醫生,我想多聽多個醫生的建議,不想再只聽一間的建議就作決定,我知你唔方便公開講,希望你可以私下告訴我,我唔想再一次受騙,我好心痛 d 頭髮,謝謝。
答: 香港的植髪中心我們不想作評語,暗示人地冇醫德係有法律責任,你見我地重來都冇推介植髮中心。不過香港數埋嘅植髪中心都係得嗰幾間,選擇唔算多。
一般 HK 醫生都唔鐘意執大陸手尾特別是 FUE,你可以去 XX 問下,因全香港衹有 XX 齋做 FUE,對處理類似情況應該最有經驗。




了解您的脫髮治療方案


衹有係植髮前與醫生透過溝通,達到共識,才能獲得最佳嘅脫髮治療方案。
如何才是最佳的植髮效果?答案應該係最能乎合你生命中,此時此刻的最急切需要。
要實現這一目標,必須事前與植髮醫生有全面而坦誠的討論,預先作出詳盡的計劃。
有人會質疑,自己才是最了解個人的需要,又上網做足功課,要覆蓋甚麼部位,用甚麽技術,移植多少束頭髮,已了然於胸,祇須打下價,揾間平靚正的植髮中心便 OK,何必要俾錢睇醫生,有乜嘢好商量?
如果醫生樣樣都同意你的睇法,你想點就點,用乜嘢方法植幾多束,全部順晒你意,你要小心! 一個有醫德的醫生當然要尊重你的意願及需要,但透過全面的檢查、和對你脫髮速度嘅評估,再憑著經驗,應該要為你提供最專業而客觀的意見,而非盲目附和。若醫生提供的服務不能滿足你的要求,則需要共同探討可行的方法。醫生應該在任何時間,確保你的決定能為你尋求最佳的利益,是非純商業決定。

每日都有網友要求推介植髮中心,無論係香港、台灣、大陸 ... 我們强調手術前一定要親身見下將會為你進行植髮的醫生,睇下啱唔啱嘴型,有冇計傾,有冇 heart 。這些都衹能親身體驗。
去吧! 燃燒你的小宇宙。



FUE 令人眼花撩亂的名稱


現今流行的 FUE 技術,由美國著名植髮醫生 Dr Rassman 及 Dr Bernstein 在 1990 年研發,原本是叫作:
FOX Procedure - FOllicular Unit EXtraction,
意思為毛囊單位抽取技術,後來改稱為:
FUE - Follicular Unit Extraction。
請留意此名稱與 『 微創 』 亳無關係,是市場推廣度出來吸引人的名稱,製造一種非手術的錯覺。 其實當時日本及澳洲亦同時間有醫生自創類似的技術,稱為:
Inaba Method ( 日本 )
Wood's Technique ( 澳洲 )

FUE 再流傳到世界各地,可惜很多醫生不專重知識產權,不感激 Dr Rassman 無私的分享技術,將 FUE 稍作修改,又另外作一個名,將他人多年辛苦換來的成果,多謝都冇聲就據為已有,話係自己開發嘅最先進技術,要求別樹一格,其中包括 : FIT, CIT, IM, DHI, FUEE ... 這是醫學服務商業化的副產品,為了謀利不講專業操守,國內當然也不甘後人,最近更出現 UR-FUE ! 死未? FUE 切出來的毛囊已經皮黃骨瘦,再 UR ( Ultra-Refined ) 重有乜野剩 ?




韓式植髮


最近颶風「玉兔」,吹襲台灣,其實「韓式植髪」亦吹襲台灣。
吹牛皮的吹,而且吹得太過份。



植髮器源自韓國,已有數十年歷史,絕非甚麼新科技,香港也有植髮中心採用,如何能稱為植髮技術大躍進?好有文革 feel。真奇怪、用韓國出產的植髮筆,便叫韓式植髮,用歐洲出產的便叫另一個甚麼專利技術,那用菲律賓出產的,莫非叫「飛奔」植髪?潮州出產的,叫「潮型」植髮? 大陸山寨廠出產的,叫A 級植髪技術 (A貨的A)?
植髪筆衹是一枝塑膠製成的儀器,沒甚麼神奇,絕不能 PK 傳統植髮技術。

植髮何止分為兩種,傳統和韓式,竟然夠膽係電視話傳統技術因為唔用植髮筆,毛囊就死三成,甚麼植髮疤痕 3-5mm,一定要剃頭,要兩星期復完,長出來嘅頭髮效果唔自然,真係踩得就踩。
而韓式植髮因為用左神奇的植髮筆,毛囊就祇死一成,甚麼植髮疤痕 0.8-1mm,唔洗剃頭,兩日復完,長出來嘅頭髮超自然,真係捧到上天。唔明點解台灣其他植髮醫生可以容忍此事!
稍為有植髮知識的,都知道用植髮筆在頭皮打出的洞,係大過傳統技術用針或刀片打出的洞,疤痕又何會細 D ? 唔合籮直。

本網結論

韓式植髮最多祇能 PK 台灣傳統植髮,與其他國家無關。




咖啡因外用配方能否改善雄性禿


最近市面上有隻含咖啡因的洗頭水,話會防脫髮,其中文網頁重聲稱效果重好過植髮。英文網頁則冇此聲明。
我哋分析過該洗頭水引用嘅幾項研究,未有足够證明咖啡因有效治療男士脫髮 。首先所測試的生髮液,除了咖啡因還有其他「補品」及維命,並非單一處方。而該實驗衹有 40 名男士參與接受測試,為期四個月。
研究評分係基於 Hair Pull Test 拔髮測試,但這測試並非針對雄性禿,而是休止期脫髮。結果雖能顯示能減少在休止期休息頭髮的數目,但未證實增加活躍生長頭髮的數目。
一個祇進行四個月的實驗,不能證明咖啡因可長久控制由遺傳因子引起的雄性禿,而此實驗冇對比組 controlled group,亦非雙盲 double-blinded,很難作完全客觀的評估,而且衹需檢查前洗多幾次頭,預先減少休止期頭髮數目,係可以控制結果嘅。

結論

咖啡因能否改善雄性禿,本網不願置評,但肯定唔會有效得過植髮。




國內植髮黃色警告


本網從來沒有針對國內的植髮界,亦深信在十三億人口中,有全心全意為人民服務且技術高超的醫生,但隨著電動 FUE 的普及,連鎖式的經營,國內近年植髮的發展很令人擔憂,受最大影響的並非本地的植髮中心,而是內地有醫德操守的醫生,被逼分担罪名。

近日人民幣升值,返內地植髮係未慳錢,各位網友要計算清楚,最大難題反而是判斷植髮中心的好壞,不要盡信討論區的留言,因有太多的 Blow Water Gunmen 。本網不宜點名批評,但如發現該中心顧問或醫生有以下黄牌動作,要小心留意。如有兩個黃牌,便升呢成紅牌 ga la 。

yellow card

黃牌動作 1 - 報大數

很多植髮中心一報就是 4,000 束,甚至 6,000 束,對於第 3 至 5 期的雄性型脫髮,有冇需要去到咁盡? 用晒 D 靚頭髮,將來揾條靚毛 (唔係靚模) 睇下都幾難!
我哋諗爆頭都唔知佢哋點樣變 6000 束頭髮出嚟,香港植髮醫生重要俾國內網友寸無料到 ( 舊 post 重温 )

黃牌動作 2 - 充大頭鬼

去年有網友第六期脫髮,去香港幾間植髮中心睇過,最多話可以一次植 2,000 束,去到國內某植髮中心,負責人又係話香港植髮醫生無料到,佢哋用獨家專有技術 Strip 加 FUE,可以輕易一次攞到 3,600 束,網友信以為真,落訂幫襯,結果衹移植了 1,900 束,當然負責人有好多藉口點解攞唔到,並退回差價。預計與實際數目有出入無可厚非,但無理由相差千幾束,所以大家要睇多幾間,對比一下,以免誤信美麗的神話。

黃牌動作 3 - 老作

另外有港男在香港做了植髮,填左個頂,大概 2,000 束,植髮後第四個月陪女朋友番國內整雙眼皮,D 好友善嘅職員知道佢做左植髮,搖晒頭,話效果好差,即時 call 左佢地嘅頂級植髮高手來,高手一望,搖頭嘆息,話係澈底失敗,「四個月無頭髮出就唔會有嘢生」,並建議他馬上做過,當然係由高手親自操刀,救黎民百性於水火。
位仁兄居然信以為真,一路蛆咒香港嘅醫生祖宗十八代,一面交錢 ...

黃牌動作 4 - 大小通吃


又有網友北上打價,醫生話要做 2,400 束,網友話唔够錢做咁多,衹夠做 600 束,醫生居然話:「咁你未做左 600 束先囉,遲 D 有錢先至做埋佢 ...」。 嘩! 手術都可以豐儉由人,真係細心體貼。

結果 - 驅逐離場

唔好誤會,俾人踢出場 Game Over 的並非那些植髮中心,而是當事人!
有網友三十多歲,男士,幾年前做左 2,500束,植在前面,但仍然好疏,揾其他醫生做第二次,結果無人啋佢,話後面捐髮區傷痕累累唔敢掂,所以各位請記住: 這世上沒有醫生有義務替人執手尾。






檢視全港的植髮中心


最後更新日期: 2013-12-17

 

 


Get free Dreamweaver templates and extensions at JustDreamweaver.com